ਜਲੰਧਰ: ਪੰਜਾਬ ਸਰਕਾਰ ਵੱਲੋਂ ਫਰਵਰੀ 2025 ‘ਚ ਸ਼ੁਰੂ ਕੀਤੀ ਗਈ ਨਸ਼ਿਆਂ ਵਿਰੁੱਧ ਮੁਹਿੰਮ ‘ਯੁੱਧ ਨਸ਼ਿਆਂ ਵਿਰੁੱਧ’ ਨੂੰ 100 ਦਿਨ ਹੋਣ ਦੇ ਬਾਵਜੂਦ, ਜਲੰਧਰ ‘ਚ ਨਸ਼ੇ ਦੀ ਲਤ ਤੇ ਨਸ਼ਾ ਤਸਕਰੀ ਰੁਕਣ ਦਾ ਨਾਮ ਨਹੀਂ ਲੈ ਰਹੀ। ਪੁਲਿਸ ਅਤੇ ਪ੍ਰਸ਼ਾਸਨ ਵੱਲੋਂ ਲਗਾਤਾਰ ਕਾਰਵਾਈਆਂ ਹੋਣ ਦੇ ਬਾਵਜੂਦ, ਨਸ਼ਾ ਗਿਰੋਹਾਂ ਦੇ ਹੌਸਲੇ ਹਾਲੇ ਵੀ ਬੁਲੰਦ ਹਨ। ਇਹੀ ਨਹੀਂ, ਨਸ਼ੇ ਕਾਰਨ ਸਿਰਫ਼ ਤਿੰਨ ਮਹੀਨਿਆਂ ‘ਚ 3 ਨੌਜਵਾਨਾਂ ਦੀ ਮੌਤ ਹੋ ਚੁੱਕੀ ਹੈ ਤੇ ਕਈ ਪਰਿਵਾਰ ਉਜੜ ਚੁੱਕੇ ਹਨ।
ਨਸ਼ਿਆਂ ਕਾਰਨ ਹੋ ਰਹੀਆਂ ਮੌਤਾਂ: ਕੋਰੋਨਾ ਨਾਲੋਂ ਵੀ ਭਿਆਨਕ ਹਾਲਾਤ
ਪਿਛਲੇ ਕੁਝ ਸਾਲਾਂ ਦੀ ਗੱਲ ਕੀਤੀ ਜਾਵੇ, ਤਾਂ ਜਦੋਂ ਕੋਰੋਨਾ ਮਹਾਂਮਾਰੀ ਦੌਰਾਨ 2 ਸਾਲਾਂ ਵਿੱਚ ਜਲੰਧਰ ‘ਚ 10 ਨੌਜਵਾਨਾਂ ਦੀ ਮੌਤ ਹੋਈ ਸੀ, ਉਥੇ ਹੁਣ ਸਿਰਫ਼ 3 ਮਹੀਨਿਆਂ ‘ਚ ਨਸ਼ੇ ਕਾਰਨ 3 ਨੌਜਵਾਨਾਂ ਦੀ ਜਾਨ ਚਲੀ ਗਈ। ਇਹ ਅੰਕੜੇ ਸਾਫ਼ ਦੱਸ ਰਹੇ ਹਨ ਕਿ ਨਸ਼ਾ ਹੁਣ ਕੋਰੋਨਾ ਨਾਲੋਂ ਵੱਡੀ ਤੇ ਤੇਜ਼ੀ ਨਾਲ ਵਧ ਰਹੀ ਸਮਾਜਿਕ ਮਹਾਂਮਾਰੀ ਬਣ ਚੁੱਕੀ ਹੈ। ਸਰਕਾਰੀ ਰਿਪੋਰਟਾਂ ਮੁਤਾਬਕ, ਮਰਨ ਵਾਲਿਆਂ ਦੀ ਉਮਰ 20 ਤੋਂ 25 ਸਾਲ ਦੇ ਵਿਚਕਾਰ ਸੀ। ਇਹ ਮੌਤਾਂ ਸਿਰਫ਼ ਨੰਬਰ ਨਹੀਂ, ਸਗੋਂ ਹਰ ਇਕ ਪਰਿਵਾਰ ਲਈ ਆਰਥਿਕ, ਮਾਨਸਿਕ ਤੇ ਸਮਾਜਿਕ ਤਬਾਹੀ ਲੈ ਕੇ ਆਈਆਂ ਹਨ। ਮਰਨ ਵਾਲਿਆਂ ਦੇ ਪਰਿਵਾਰਾਂ ਨੇ ਉਨ੍ਹਾਂ ਨੂੰ ਨਸ਼ੇ ਤੋਂ ਬਚਾਉਣ ਲਈ ਇਲਾਜ ਕਰਵਾਇਆ, ਘਰ-ਬਾਰ ਵੇਚਿਆ, ਦਵਾਈਆਂ ਲਈ ਕਰਜ਼ੇ ਚੁੱਕੇ, ਪਰ ਅੰਤ ਵਿੱਚ ਆਪਣੇ ਜਵਾਨ ਪੁੱਤਰਾਂ ਦੀ ਲਾਸ਼ ਉਠਾਉਣੀ ਪਈ।
ਨਸ਼ਾ ਤਸਕਰੀ ਦੇ ਅੱਡੇ: ਜਲੰਧਰ ‘ਚ ਘੱਟ ਨਹੀਂ ਹੋ ਰਹੀ ਤਸਕਰੀ
ਅੰਕੜਿਆਂ ਅਨੁਸਾਰ, ਪਿਛਲੇ 2 ਸਾਲਾਂ ‘ਚ 2123 ਨਸ਼ਾ ਤਸਕਰੀ ਦੇ ਮਾਮਲੇ ਦਰਜ ਹੋਏ, ਜਿਨ੍ਹਾਂ ‘ਚ 2468 ਲੋਕ ਗ੍ਰਿਫ਼ਤਾਰ ਹੋਏ। ਇਹ ਗ੍ਰਿਫ਼ਤਾਰੀਅਾਂ ਵਿੱਚ 500 ਤੋਂ ਵੱਧ ਔਰਤਾਂ ਵੀ ਸ਼ਾਮਲ ਹਨ। ਇਹ ਦਰਸਾਉਂਦਾ ਹੈ ਕਿ ਨਸ਼ੇ ਦੀ ਲਾਹਨਤ ਸਿਰਫ਼ ਨੌਜਵਾਨਾਂ ਹੀ ਨਹੀਂ, ਔਰਤਾਂ ਨੂੰ ਵੀ ਗਿਰਫ਼ਤ ‘ਚ ਲੈ ਰਹੀ ਹੈ। ਜਲੰਧਰ ਦੇ ਨਸ਼ਾ ਛੁਡਾਊ ਕੇਂਦਰਾਂ ‘ਚ ਹਰ ਸਾਲ ਲਗਭਗ 600 ਮਰੀਜ਼ ਦਾਖਲ ਹੁੰਦੇ ਹਨ। ਇਹ ਗਿਣਤੀ ਸਾਫ਼ ਕਰਦੀ ਹੈ ਕਿ ਇਲਾਜ ਕਰਵਾਉਣ ਵਾਲਿਆਂ ਦੀ ਗਿਣਤੀ ਵਧ ਰਹੀ ਹੈ, ਪਰ ਨਸ਼ਾ ਛੁਟ ਰਿਹਾ ਨਹੀਂ।
ਸ਼ਹਿਰ ਦੇ ਇਲਾਕਿਆਂ ‘ਚ ਖੁੱਲ੍ਹੇਆਮ ਵਿੱਕਦਾ ਨਸ਼ਾ
ਜਲੰਧਰ ਦੇ ਕਈ ਇਲਾਕੇ, ਜਿਵੇਂ
ਢੰਨ ਮੁਹੱਲਾ, ਕਾਜ਼ੀ ਮੰਡੀ, ਬਸਤੀ ਸ਼ੇਖ, ਅਜੀਤ ਨਗਰ, ਮਾਡਲ ਹਾਊਸ, ਅਬਾਦਪੁਰ, ਇੰਡਸਟਰੀ ਏਰੀਆ, ਲੰਮਾ ਪਿੰਡ ਚੌਕ, ਅਲੀ ਮੁਹੱਲਾ, ਲੱਖੜ ਬਾਜ਼ਾਰ, ਤੇ
ਪਿੰਡ ਗੰਨਾ, ਲਖਨਪਾਲ, ਧਰਮੇ ਦੀਆ ਛੰਨਾਂ ਆਦਿ, ਨਸ਼ਾ ਤਸਕਰੀ ਦੇ ਪੁਰਾਣੇ ਹੱਥ ਬਣੇ ਹੋਏ ਹਨ। ਪੁਲਿਸ ਵੱਲੋਂ ਇੱਥੇ ਕਈ ਵਾਰ ਛਾਪੇਮਾਰੀ ਕੀਤੀ ਜਾਂਦੀ ਹੈ, ਪਰ ਕੁਝ ਦਿਨ ਬਾਅਦ ਫਿਰ ਤਸਕਰੀ ਸ਼ੁਰੂ ਹੋ ਜਾਂਦੀ ਹੈ। ਲੋਕੀ ਦੱਸਦੇ ਹਨ ਕਿ ਕਈ ਵਾਰ ਨਸ਼ਾ ਤਸਕਰਾਂ ਨੂੰ ‘ਪਹੁੰਚ ਵਾਲੇ’ ਮਾਣਸਾਂ ਦੀ ਹਿਮਾਇਤ ਮਿਲਦੀ ਹੈ, ਜੋ ਉਨ੍ਹਾਂ ਨੂੰ ਪੁਲਿਸ ਕਾਰਵਾਈ ਤੋਂ ਬਚਾਉਂਦੇ ਹਨ।
ਟਾਸਕ ਫੋਰਸ ਬਣੀ, ਪਰ ਨਤੀਜਾ ਨਿਖਰਿਆ ਨਹੀਂ
ਨਸ਼ੇ ਦੀ ਲਾਹਨਤ ਨੂੰ ਰੋਕਣ ਲਈ ਪੁਲਿਸ ਨੇ ਖ਼ਾਸ ਟਾਸਕ ਫੋਰਸ ਬਣਾਈ। ਕਈ ਵੱਡੇ ਆਪ੍ਰੇਸ਼ਨ ਵੀ ਕੀਤੇ, ਪਰ ਹਕੀਕਤ ਇਹ ਹੈ ਕਿ ਨਸ਼ਾ ਤਸਕਰੀ ਅਜੇ ਵੀ ਜਾਰੀ ਹੈ। ਟਾਸਕ ਫੋਰਸ ਨੂੰ ਜਿੰਨਾ ਸਖ਼ਤ ਬਣਾਇਆ ਗਿਆ, ਨਸ਼ਾ ਗਿਰੋਹ ਵੀ ਉਨਾ ਹੀ ਤੇਜ਼ ਹੋ ਗਏ।
22 ਗੈਰ-ਕਾਨੂੰਨੀ ਉਸਾਰੀਆਂ ਢਾਹੀਆਂ: ਫਿਰ ਵੀ ਤਸਕਰੀ ਜਾਰੀ
ਪਿਛਲੇ 3 ਮਹੀਨਿਆਂ ‘ਚ ਜਲੰਧਰ ‘ਚ ਨਸ਼ਾ ਤਸਕਰਾਂ ਵੱਲੋਂ ਬਣਾਈਆਂ 22 ਗੈਰ-ਕਾਨੂੰਨੀ ਇਮਾਰਤਾਂ ਪੁਲਿਸ ਤੇ ਨਗਰ ਨਿਗਮ ਨੇ ਢਾਹ ਦਿੱਤੀਆਂ।
ਕਮਿਸ਼ਨਰੇਟ ਪੁਲਿਸ ਵੱਲੋਂ 9 ਅਤੇ ਦਿਹਾਤੀ ਪੁਲਿਸ ਵੱਲੋਂ 13 ਢਾਹੀਆਂ ਗਈਆਂ। ਇਨ੍ਹਾਂ ਢਹੇਰੇ ਗਏ ਢਾਂਚਿਆਂ ‘ਚੋਂ ਕਰੋੜਾਂ ਦੀ ਨਸ਼ਾ ਕਮਾਈ ਦੀ ਪੁਸ਼ਟੀ ਹੋਈ। ਇਸ ਦੌਰਾਨ 60 ਕਿਲੋ ਹੈਰੋਇਨ, 70 ਕਿਲੋ ਅਫੀਮ ਅਤੇ 60 ਹਜ਼ਾਰ ਪਾਬੰਦੀਸ਼ੁਦਾ ਗੋਲੀਆਂ ਬਰਾਮਦ ਹੋਈਆਂ।
ਇਕ ਪਰਿਵਾਰ ਦੀ ਵਿਥਾ: ਉਜੜੇ ਸਪਨੇ
ਫਰਵਰੀ 2025 ‘ਚ ਬਸਤੀਆਂ ਵਾਲੇ ਇਕ ਨੌਜਵਾਨ ਦੀ ਨਸ਼ੇ ਦੀ ਲਤ ਕਾਰਨ ਮੌਤ ਹੋਈ। ਪਰਿਵਾਰ ਨੇ ਇਲਾਜ ਕਰਵਾਇਆ, ਘਰ ਵੇਚਿਆ, ਕਿਤਾਬਾਂ ਤੱਕ ਗਿਰਵੀ ਰੱਖੀਆਂ, ਪਰ ਨਸ਼ਾ ਤਸਕਰ ਨਸ਼ਾ ਪਹੁੰਚਾਉਂਦੇ ਰਹੇ। ਅੰਤ ਵਿੱਚ ਪੁੱਤਰ ਦੀ ਮੌਤ ਹੋ ਗਈ। ਹੁਣ ਪਰਿਵਾਰ ਦੀਆਂ ਔਰਤਾਂ ਲੋਕਾਂ ਦੇ ਘਰਾਂ ‘ਚ ਕੰਮ ਕਰ ਰਹੀਆਂ ਹਨ। ਇਹ ਸਿਰਫ਼ ਇਕ ਪਰਿਵਾਰ ਦੀ ਕਹਾਣੀ ਨਹੀਂ -ਜਲੰਧਰ ‘ਚ ਅਜਿਹੀਆਂ ਸੈਂਕੜੇ ਘਰਾਂ ਦੀ ਹਾਲਤ ਇਹੀ ਹੈ।
ਸਵਾਲ ਇਹ ਹੈ: ਕੀ 100 ਦਿਨਾਂ ਦੀ ਮੁਹਿੰਮ ਹੀ ਕਾਫੀ ਸੀ?
100 ਦਿਨਾਂ ‘ਚ ਇਹੋ ਜਿਹੇ ਨਤੀਜੇ ਵੇਖ ਕੇ, ਲੋਕ ਪੁੱਛ ਰਹੇ ਹਨ –“ਸਿਰਫ਼ ਕਾਰਵਾਈ ਨਹੀਂ, ਜੜ੍ਹ ਤੋੜਣ ਦੀ ਲੋੜ ਹੈ।” ਸਰਕਾਰ ਨੂੰ ਚਾਹੀਦਾ ਹੈ ਕਿ ਨਸ਼ਾ ਤਸਕਰੀ ਦੇ ਅਸਲ ਆਕਾ ਤੇ ਸਿਆਸੀ ਹਿਮਾਇਤੀਆਂ ‘ਤੇ ਕਾਰਵਾਈ ਕਰੇ। ਨਹੀਂ ਤਾਂ ਇਹ ਨਸ਼ਾ ਤੇ ਨੌਜਵਾਨੀ ਦੋਵਾਂ ਅਜਿਹੀ ਗਲਤ ਹਾਲਤ ਵਿਚ ਫਸ ਜਾਣਗੇ, ਜਿੱਥੋਂ ਕੱਢਣਾ ਮੁਸ਼ਕਲ ਹੋ ਜਾਵੇਗਾ।
